香港長者安居協會老友網會員鄭靄儀(Rosa，68歲)，及郭婉玲(Ling，61歲)兩個人打機齡約三個月。六月時，協會跟Acer合作主辦了個「老友鬼鬼電競大賽2018」，三位長者加兩位年輕選手一齊玩一齊叫，違和得嚟好Warm。電話度，Ling話：「哦，我哋平時唔會玩到嗌晒，好冷靜嘅。係贏咗會Yeah下咁囉。」網吧裏，負責專心幫人補血的「奶媽」Rosa，一路玩一路口噏噏：「打佢打佢打佢打佢。哎，傻仔阿Bob(電腦選手)就死啦仲唔走。我同你補血！」Ling則老神在在：「唔使打啦，個塔都就爆，嗱！掂咗！」
負責做輔助的Rosa，一來因為第二次開機，《暴雪英霸》電腦系統自動送了隻輔助英雄烏瑟給她，有感兒子跟爸爸，都是現役及戰時的醫護人員，覺得是緣份，也很有意義，就決心全力做好「奶媽」的角色。從小文靜內向，喜歡收埋自己的Ling，曾以為自己適合做輔助殿後，誰知：「發現成日留意唔到，或救完，個同伴死咗！同原來我好鍾意追住啲英雄來打！我冇諗過自己攻擊性咁勁啊！哈哈哈！」常用英雄納奇班，是能大範圍攻擊的英雄。
退休教師，唔鍾意打麻雀坐唔定的Rosa，喜歡跟兩位電競妹妹聊天：「老人家要訓練腦筋，手腳靈活，且讓人覺得我這年紀仍肯嘗試。要自己走入年輕人的世界，唔好隔開咗咁，與時並進嘛。」Ling玩過Candy Crush，覺得打機浪費時間：「打極都有新難關，無止境的。」但見電競又要組隊又要合作又要戰略，咪試下。上次電競大賽她輸了，即時跟自己講「唔玩喇！」但第二朝瞓醒睇見部電腦，心思思又開機：「(掩嘴)20分鐘一場賽事，一日玩十場八場。但我有去中心做義工，做家務，冇唔煮飯呀！」其實近年Ling常失眠，或一晚醒數次，Ling欲言又止：「我想我知道為甚麼。來到一個年紀，總有一些事情我們得接受。朋友形容為空窗期。我好明白孩子們長大了，他們有他們的生活，我有我的忙碌(笑)。他們其實都有適時回來聊天、一起去旅行的。但一年365日，他們能陪我多少呢。」無論幾歲，孩子永遠是媽媽心頭肉，理智與感情，不是講句「係咁啦」就能同步。現在逢周一、周四Ling就落中心跟隊友打機，從來唔聲唔聲的她，「迫」住變得有勇有謀：「打一場機時間短，唔到你唔諗策略同講自己想點了！都係一班人喺中心玩開心。」；睡前飯後就跟電腦、跟老友連線攻城，打到累就瞓：「居然可一覺睡天光啊。」笑得呵呵呵
長者安居協會老友網經理袁慧明(Debby)說，我們對長者會有些前設、限制，其實都未必：「最重要是心態。」他們中心之前辦「銀齡製作室」拍微電影，試過好多有趣的事情，貪得意試下電競等大家知道係乜，誰知反應熱烈，個個打得好開心：「只要長者願意走出一步，接受新事物新挑戰，其實他們真能做到更多我們意料之外的事。」
來源：蘋果日報
留言